une poubelle a durban
العربي الموسخ
دايمن يقولولي احنا العرب موسخين
1. الطرقان ما تقدرش تشوف فيهم تالمون كاين الزبل في كل بلاص الناس تمشي فالطروطوار و يقيسو فالكواغطك
2. التجار عند حوانيتهم نادر نتاع كرطون
3. الخضارة صحاب الكراريس وين ما صبتهم تمشي على الحشيش فوق الكارلاج و المنجور.
4. الغرايين يمشو و يخرمطو فالحيطان و يهرسو فالبوطويات.
5. حالة ما تشوفش فيها نزيدك الكونتونار نتاع الزبل فالباطيمات زعما غير تفوت حداهم ما تقدرش تتنفس
6. الناس تقيس مالتواقي البرايس نتاع الزبل تشوف بورسة جايتك مالكاتريام إيطاج.
7. الميكانسيان يقيس الزيت المحروقة فالمنجور ديركت.
8. الحواتة يبيعو الحوت و السردين على الطريق و تحت الشمس
9. طالقين ولادهم بخناينهم برا يلعبو فالطريق ما عندهمش حتى خمس سنسين تقولو كي سموك ما يعرفش ايلا خونو واحد اطفرت علا اميمتو اللي طاقاتو.
قاع هاد الشي و العربي انا عندي ماشي موسخ هو برك قضية نتاع اجتهاد من عند الي فوطا عليهم الشعب و المسؤولين.
1. العربي اذا صاب لي بوبال نتاع البلدية في كل بلاص يقيس الزبل فيها و ما يقيسش في الطريق.
2. و التاجر اذا قاس الكرطون نتاعو في الطريق يخلص بروصي و كبير كيما راهم يديرو معا الشوافرا منين يحرق فوروج يخلص 6000 دج. نضمنلكم بلي الطريق تولي هاك شابة على شرط واحد آخر البلدية تسقم الطروطوارات و تزوق البلاد.
3. الخضارة صحاب الكراريس يلزم تبنيلهم مارشيات نتاع الكارطيات و الي بغا يقعد يبيع فالكروسة يلزملو بلاصة كيما كاين في لا باستي في وهرن. سيستام شباب خلاتو فرنسا و مازالو يخدم مليح البلدية برك مور ما يبلع السوق يلزمها تلم قاع الزبل.
أنا البلاد الي راني ساكن فيها البلدية ما زادتش بنات مارشي واحد من 1962 و البلاد كبرت عشر مرات .
4. الغرايين يلزملهم ديار الشباب و الجاردانات و لي بارك نتاع اللعب و بزاف الصوالح باش يطورو الهوايات نتاعهم هادي لازم يعلم بيها المنتخبين. أنا البلاد الي راني فيها كاين بيسين بصح دايرينها قهوة و كاين دار شباب بصح ما يجيها غير جيرانها و كاين جاردان بصح بعيد على دارنا و البارك زعما هي الغابة بصح الشجر قاع يبسو فيها و ردوها مقبرة.
5. الباطيمات و لي كونتونار نتاع الزبل ما راهمش قايمين بيهم البلدية تخليهم حتى يتعمرو و يفيضو ما دارينهمش في بلايص خازنين على الناس و ما ينقيوهمش منين يخويوهم ألو كيفاش بغيتو العربي يقعد مقي.
6. الباطيمات العاليين ما عندهمش اصونصار و ما عندهمش سيستام نتاع لي بوبال انتيقري فالباطيمات كان برك يزيدو بير يفرغ ديركت في بوبال كبيرة تاع كل باطيمات ملي راهم يبنيو الباطيمات قليل قليل بزاف وين نشوف هاد السيستام نتال لي بوبال بالبير وين كل واحد يقيس الزبل نتاعه منالاتاج نتاعو. الباطيمات نتاع لوبيجيي يلزمها كونسيارج لكل باطيمات بهاذ الشي يكون ليموبل نقي منالداخل و برا . ياك العربي راه يخلص الكرا نتاع السكنان و كيفاش عندنا مازال ما تتبنتر الباطيمات الى نبنات في 1985
7. البروصي هو الحل منين تجي لا بوليس نتاع لوبانيزم الي ما شفناهاش جامي دارت بروصي لواحد يدير فيدونج نتاع لوطوه والا بلعت لميكانيسيان حا قاراج في بلاصا مشي نتاع خدمة
8. هاد ليام المرشي نتاع الحواته بلعوه باش يسقموه اوكي حاجة مليحة و الحواته ما عندهمش بلاصه وين يبيعو الحوت. من 1962 و الحوت ينباع في بلاصة وحدة كيفاش البلدية ما تكاكاتش لهذ البروبلام و على الاقل تكبر البلاصة نتاع الحوات ة والا تبني مارشي وحد آخر نتاع الحوت. و الي يبيع الخوت برا يلزملو العقوبة.
9. الديار الي يسكنو فيهم الناس ضيقين سي بور سا ك تصيم الأم تريسكي و تخرج ولدها برا باش تقضي الشغل نتاع الدار طرانكيل. لوكان الناس كان عندهم ديار كبار ما كانش هاد المشكل . لي كراش نتاع الكارطيات تانيك حل لهد المشكلة و البلدية ما يليقلهاش.
واش بغيتو نقوللكم اكثر من هاد الشي أنا نطرح كستيون وحدة و الفاهم يفهم.
في أوربا نشوفي مرة على مرة أشرطة على الحرب العالمية اللولة و الزاوجة و الميزيرية الي كانت في داك الوقت و كيفاش كانو القور عايشين برسك كيما العرب المسخين ما كانوش يعرفو الصابون و كان الزبل بارتو و الغرايين يلعبو برا و المرشيات كي الديبوطوار و الا الباسورة. و منين تسقمت عليهم ليام و ولاو يخدمو و يدخلو الدراهم تنقاو. أسكو الناس هادو اللي أحنا نقولو عليهم مسخين يعيشو في بحبوحة ؟
كاين سؤال آخر العربي منين يكون في بلاد القور علاه يتنقى و يولي منظم؟ ياك غير هو هو نفس البنادم روماركيو بلي البلاد و النظام تبدل عليه الطريق نقية و الي يقيس الوسخ يخلص بروصي . و شكون ينقي ويوقف على نقاوته المواطن والا البلدية الي فوطا عليها الشعب
و الا كاين شي ناس ما بغاوش يقتنعو بلي العربي خاطيه لازم نحبسو ما نفوطيو على رؤساء البلدياش ياك المواطن هو اليم سؤول على البلاد.
السلام عليكم يا خويا اللي مسخ امسخ روح اضرب طل على بعض أحياءالعاصمة تحسب روحك راك في رومانيا من جمالها
ردحذفيا خويا لا تقول العربي المسخ انا في رايي تقول اصحاب الغرب المسخين وشكرا
و إلى لقاء آخر
آه نسيت سمحلي خويا مليح كون يصيبو حل للدخلة تاع الدبو يعني الورشات المشتا راهي جايا؟؟
باين عليك ما فهمت والو ملي كنت نقول فيه ما قريت ما فهمت
ردحذف